Eddie Garcia, balik-GMA na naman!

Bilib din ako kay Eddie Garcia dahil kahit saang TV stations ay nakikita ko siyang lumalabas. At hindi basta-basta ang mga role na ginagampanan niya, dahil lahat `yon markado, at hindi mo siya puwedeng isnabin, ha!


Matapos nga niyang lumabas sa Babaeng Hampaslupa sa TV5, bilang kontrabida sa buhay ni Susan Roces, heto at nasa GMA 7 na naman siya sa seryeng Iglot nina Claudine Barretto, Jolina Magdangal at Marvin Agustin.


Magsisilbing special guest daw ng Iglot si Eddie Garcia. Gagampanan niya ang role na Mang Celso, isang ex-convict na nais magbagong-buhay matapos makulong nang mahabang panahon.


Mangungumpisal siya kay Father Ruben (Romnick Sarmenta) at laking gulat niya nang bigla na lamang tumayo at lumabas ng confession room ang pari. Bakit ganoon na lamang ang reaksyon ni Father Ruben nang marinig ang kwento ni Mang Celso?


Makahingi pa kaya ng tawad si Mang Celso para sa kaniyang mga kasalanan? Magkita kaya sila ni Iglot?--Alfie Lorenzo